ಒಮ್ಮೆ ನಕ್ಕುಬಿಡಿ...! - ಹವ್ಯಕ ವಾರ್ತೆ ಮೇ ೨೦೧೫ ರಲ್ಲಿ ಪ್ರಕಟಿತ ಹಾಸ್ಯ ಲೇಖನ

ಒಮ್ಮೆ ನಕ್ಕುಬಿಡಿ...!

ಓ ಮೊನ್ನೆ ಒಂದರಿ ಮಾರ್ಕೆಟ್ಟಿಂಗೆ ಎಂಗೊ ಗೆಂಡ ಹೆಂಡತಿ ಹೋಪಲಿಪ್ಪ ದಿನ ಎನ್ನ ಫ್ರೆಂಡಿಂಗೆ ಮೆಸ್ಸೇಜು ಮಾಡಿ ತಿಳ್ಸಿತ್ತೆ, "ಮಕ್ಕಳ ಶಾಲಗೆ, ಕಾಲೇಜಿಂಗೆ ಕಳುಸಿ ಆತು, ಇನ್ನು ಎಂಗೊ ಇಬ್ರೂ ಸಿಟಿಗೆ ಹೋಯಕ್ಕು" ಹೇಳಿ! ಎಂಗೊ ಹಾಂಗೆ, ನಡಕ್ಕೊಂಡು ಹೋಪಾಗ ಸಣ್ಣಕ್ಕೆ ಡಂಕಿದರೂ ಅದರನ್ನೂದೇ ಸಂದೇಶದ ಮೂಲಕವೋ, ಕರೆಯ ಮೂಖಾಂತರವೋ ಹೇಳಿಕೊಂಬ ಪಕ್ಕಾ ಚೆಡ್ಡಿ ದೋಸ್ತುಗೊ! ಕುಶಾಲು ಮಾತಾಡಿಯೊಂಡು, ನೆಗೆ ಮಾಡಿಯೊಂಡು ಇಪ್ಪದೇ ಎಂಗಳ ಕಾಯಕ! ಮನಸ್ಸಿಲ್ಲಿಪ್ಪದರ ನೇರ ಹೇಳುದು! ವ್ಯಂಗ್ಯ, ಟೀಕೆ, ತಾತ್ಸಾರ, ಕೇಡು, ಒಣಪ್ರತಿಷ್ಠೆ, ಜೆಂಭ ಎಂಗಳ ಡಿಕ್ಸ್‍ನರಿಲೇ ಇಲ್ಲೆ, ಬರೇ ತಮಾಷೆ, ನಗು, ಒಬ್ಬನ ಕಷ್ಟ, ಸುಖಕ್ಕಪ್ಪದು ಇಷ್ಟೇ ಎಂಗಳಿಬ್ಬರ ಬಂಡವಾಳ! ನಮ್ಮ ಈ ಪರಿಯ ಸ್ನೇಹವ ಕಂಡು ಅದರ ಗೆಂಡ, "ಸುಬ್ರಹ್ಮಣ್ಯಕ್ಕೆ ಹೋಗಿ ಹುಡುಕಿದರೂ ನಿಂಗಳ ಹಾಂಗಿಪ್ಪ ಜೋಡಿಗೊ ಸಿಕ್ಕಾ" ಹೇಳಿ ಸಾಮಾನ್ಯವಾಗಿ ಹೇಳಿಕೊಂಡಿರ‍್ತವಡ! ಸರಿ ಆನು ಕಳ್ಸಿದ ಆ ಸಂದೇಶಕ್ಕೆ, "ಆತು ಗೆಂಡ ಹೆಂಡತಿ ಒಟ್ಟಿಂಗೆ ಹೋಗಿ ಮಜಾ ಮಾಡಿ ಬನ್ನಿ" ಹೇಳಿ ಉತ್ತರ ಕೊಟ್ಟತ್ತದು! ಮನೆಲಿ ಒಂದು ನಮೂನೆ ಕೆಲಸ ಎಲ್ಲಾ ಮುಗುದು ಒತ್ತರೆ ಮಾಡಿ ಅಪ್ಪಗ ಜೀವ ಕೊರಳಿಂಗೊರೆಗೆ ಬೈಂದು ಮಾರಾಯ್ರೇ! ಈ ಕಂಪ್ಯೂಟರಿನ ಆನ್ ಮಾಡಿ ಇಂಟರ‍್ನೆಟ್ ಮೂಲಕ ಎಂತೆಲ್ಲೋ ಸಾಮಾನುಗಳ ತರಿಸುಲಕ್ಕಡ! ಆದರೆ ಮನೆಲಿ ರಿಪೇರಿಗೆ ಬಿದ್ದ ಉಪಕರಣಂಗಳ ರಿಪೇರಿ ಮಾಡಿಕೊಡ್ಲಿಗಾ ಆ ಕಂಪ್ಯೂಟರಿಂಗೆ, ಅಲ್ಲಾ ನವಗೆ ಒಂದು ಸಣ್ಣ ಪ್ರಮಾಣಲ್ಲಿ ಬೇಕಾದ ತರಕಾರಿ, ಹಣ್ಣು ಹಂಪಲು, ಕಾಯಿ, ಎಣ್ಣೆ, ಮದ್ದು ಎಲ್ಲಾ ಅದಕ್ಕೆ ತಂದು ನಮ್ಮ ಮನಗೆ ಎತ್ತಿಸುಲೆಡಿಗಾ?! ನಮ್ಮ ಕಿರು ಬೆರಳಿಲಿ ಇಡೀ ಪ್ರಪಂಚವನ್ನೇ ಕೊಣಿಶಿಲೆಡಿಗು ಹೇಳಿ ನಾವು ಗ್ರೇಶುದಷ್ಟೇ ಈ ಇಂಟರ‍್ನೆಟ್, ಮೊಬೈಲು ಎಲ್ಲಾ ಇದ್ದು ಹೇಳಿ ಹೇಳಿಯೊಂಡು! ಎಂತ ಇದ್ದರುದೇ ನಾವು ನಾವೇ ಖುದ್ದಾಗಿ ಹೆರ ಹೋಗಿ ಮಾಡಲೇ ಬೇಕಾದ ಅನಿವಾರ್ಯ ಕೆಲಸಂಗೊ ಸಾವಿರದೆಂಟಿರ‍್ತು! ಹೆರ ಬೆಶಿಲು ಕೊದಿತ್ತು ಬೇರೆ, ಮೊದಾಲೇ ಸುಸ್ತಾದ ಎರಡು ಜೀವಂಗೊ. ಎರಡೂ ಜೀವಂಗೊ ಹೇಳಿದ್ದೆಂತಕೆ ಹೇಳಿರೆ, ಮನೆಲಿ ಇವ್ವುದೇ ಸುಮ್ಮಗೆ ಕೂಪ ಜೆನ ಅಲ್ಲ. ಅಮ್ಮಾವ್ರ ಗೆಂಡ ಅಲ್ಲದ್ರೂ ಅವ್ವೇ ಆಗಿ ಒಳ ಬಂದು ಕೆಲವು ಕೆಲಸಲ್ಲೆಲ್ಲಾ ಬಂದು ಸೇರ‍್ತವು, ಹಾಂಗೆ ಆಡಿ ಕೂಡಿ ಮನೆಕೆಲಸಂಗಳ ಇಬ್ರೂ ಸೇರಿ ಮಾಡಿ ಮುಗುಶುದು! ಅಲ್ಲಾ, ಎಂಗಳ ಬದ್ಧ ಆದ ಮತ್ತೇ, ಪಾರ್ಕು, ಸಿನೆಮಾ ಹೇಳಿ ತಿರುಗಿದ ಜೆನಂಗ ಎಂಗೊ ಅಲ್ಲ, ಆತು, ಮದುವೆ ಆದ ಮತ್ತಾದ್ರೂ ಹನಿಮೂನ್ ಹೋಯಿದಿರಾ ಹೇಳಿ ನಿಂಗೊಲ್ಲಾ ಕೆಮಿ ಅಗಲಿಸಿ ಕೇಳಿದರೂದೇ, "ಹೋಯಿದಿಲ್ಲೆಪ್ಪಾ ಹೋಯಿದಿಲ್ಲೆಯಾ" ಹೇಳಿ ಎಂಗಳ ಉತ್ತರ! ’ಇಲ್ಲೇ ಸ್ವರ್ಗ, ಇಲ್ಲೇ ನರಕ, ಬೇರೆ ಇಲ್ಲಾ ಸುಳ್ಳು’ ಹೇಳಿ ಕೂದ ಜೆನಂಗ, ಮತ್ತೂ ಒಂದು ದಿನ ಆದರೂ ಅಂತೇ ಪೇಟೆ ಸುತ್ತಿದ ಜೆನಂಗಳೂ ಅಲ್ಲ! ಎಂತರಾ ಮಜಾ ಅಪ್ಪಾ, ಈ ಇಳಿವಯಸ್ಸಿಲಿ!! ಎಂಗೊ ಪಾಪ ಪೇಟೆಗೆ ಹೋಪದು ಮಾಡ್ಲಿಪ್ಪ ಕೆಲಸಂಗಳ ಎಲ್ಲಾ ಪಟ್ಟಿ ಮಾಡಿಗೊಂಡು, ಕಾರಿಲಿ ಹೋಗಿ ಮುಗುಶಿ ಬಪ್ಪದು. ಕಾರು ಹೇಳಿ ದೊಡ್ಡಸ್ಥಿಕೆ ಹೇಳಿಕೊಂಬದಲ್ಲ, ಪೆಟ್ರೋಲ್ ಖರ್ಚಾವುತ್ತು ಹೇಳಿ ಮನೆಯ ಶೆಡ್ಡಿಲಿ ಕಾರಿನ ಬಿಟ್ಟು ಹೋದರೆ ನಾಲ್ಕು ಜೆನಂಗ ಇಪ್ಪ ಎಂಗಳ ಕುಟುಂಬಕ್ಕೆ ಒಂದು ತಿಂಗಳಿಂಗಿಪ್ಪ ಸಾಮಾನು, ಸರಂಜಾಮು ತರೇಕಾರೆ ಹತ್ತು ಸಲ ಸ್ಕೂಟರಿಲೋ, ಬಸ್ಸಿಲೋ ಹೋಯೇಕ್ಕಕ್ಕು, ತಿಂಗಳಲ್ಲಿ ಇಪ್ಪ ಮೂವತ್ತು ದಿನಂಗಳಲ್ಲಿ ಅರೆವಾಶಿ ದಿನಂಗಳೂ ಪೇಟೆಲಿ ತಿರುಗುವ ಕಾರ್ಯಕ್ರಮ ಆಗಿ ಹೋಕು! ಆಟೋ ಮಾಡಿ ತಂದರೆ ದೊಡ್ಡ ತೊಂದರೆ! ಇಳುದಾದ ಮತ್ತೆ ವಾಪಸ್ಸು ಹೋಪಾಗ ಖಾಲಿ ಹೋಯೇಕ್ಕು, ಬಾಡಿಗೆ ಸಿಕ್ಕುತ್ತಿಲ್ಲೆ ಹೇಳಿ ಕಷ್ಟ ಹೇಳಿಯೊಂಡು ದುಪ್ಪಟ್ಟು ಚಾರ್ಜು ಕಿಸೆಂದ ಪೀಂಕಿಸಿಬಿಡ್ತವು ಡ್ರೈವರುಗೊ! ಅವರ ಹತ್ರ ಮಾತಾಡಿ ವಾದ ಮಾಡುಲೆ ಶಕ್ತಿ ಇಲ್ಲದ್ದೇ ಕೊಟ್ಟು ಕಳುಶುದು ಮತ್ತೆ! ಅಲ್ಲಾ ಬಂದ ಆಟೋ ವಾಪಸ್ಸು ಹೋಪಾಗ ಬಾಡಿಗೆಗೆ ಜೆನ ಸಿಕ್ಕದ್ದರೆ ನಾವು ಜವಾಬ್ದಾರಿಯಾ ಹೇಳಿ? ಆದ ಕಾರಣ ನಮ್ಮದು ಹೇಳಿ ಇಪ್ಪ ಸೆಕೆಂಡ್ ಹ್ಯಾಂಡ್ ಸಣ್ಣ ಕಾರಿಲೇ ನಮ್ಮ ಮಾರ್ಕೆಟ್ ಪಯಣ! ಮಾತಾಡ್ತಾ ಆಡ್ತಾ ಎಲ್ಲಿಗೋ ಹೋಗಿಬಿಟ್ಟೆ! ಸರಿ ವಿಷಯಕ್ಕೆ ಬಪ್ಪ. ಪೇಟೆಲಿ ಒಂದೆರಡು ಕೆಲಸಂಗ ಇಪ್ಪದಾ? ಕರೆಂಟು, ನೀರಿನ ಬಿಲ್ಲು ಕಟ್ಟುಲೆ, ಮನೆ ಕಂದಾಯ ಪಾವತಿ ಮಾಡುಲೆ, ಮೊಬೈಲು ರಿಚಾರ್ಜು ಮಾಡ್ಸುಲೆ, ಜಿನಸು ಸಾಮನು, ತರಕಾರಿ, ಹಣ್ಣು ಹಂಪಲು ತಪ್ಪಲೆ, ಗೋಧಿ ಹೊಡಿ ಮಾಡ್ಸುಲೆ, ಅನಿವಾರ್ಯ ಹೇಳಿ ಖರೀದಿಸಿ ತಂದ ಮತ್ತೆ ವರ್ಷಲ್ಲಿ ಕಡಮ್ಮೆಲಿ ನಾಲ್ಕು ಸರ್ತಿ ರಿಪೇರಿಗೆ ಬಪ್ಪಂತಾ, ಕಂಪ್ಯೂಟರನ್ನೋ, ಮಿಕ್ಸಿಯನ್ನೋ, ಇಸ್ತ್ರಿ ಪೆಟ್ಟಿಗೆಯನ್ನೋ, ಗ್ಯಾಸ್ ಸ್ಟವ್ವನ್ನೋ, ಕೈಕೊಟ್ಟ ಮೊಬೈಲನ್ನೋ, ಆನಿಲ್ಲದ್ದರೆ ಯೇವ ಕೆಲಸವೂ ಆಗ ಹೇಳಿ ಸವಾಲೊಡ್ಡಿ ಪೂರ್ಣ ವಿರಾಮ ಹಾಕಿ ನಿಂದ ಗೋಡೆಗಡಿಯಾರವನ್ನೋ ರಿಪೇರಿ ಮಾಡ್ಸುಲೆ ತೆಕ್ಕಂಡು ಹೋಪದು ಇತ್ಯಾದಿ ಕೆಲಸಂಗೊ, ಪಟ್ಟಿ ಮಾಡ್ತಾ ಹೋದರೆ ಅದುವೇ ದೊಡ್ಡ ಕತೆ ಆಗಿ ತಲೆಗಿಂತ ಮುಂಡಾಸು ದೊಡ್ಡದಾತು ಹೇಳುವ ಗಾದೆ ಮಾತಿನಾಂಗೆ ಅಕ್ಕು ಈ ಬರೆತ್ತಾ ಇಪ್ಪ ಲೇಖನದ ಅವಸ್ಥೆ ಕೂಡಾ! ಈ ಮೇಲೆ ಪಟ್ಟಿ ಮಾಡಿದ ಕೆಲಸಂಗಳ ಮುಗುಶುಲೆ ಖಂಡಿತಾ ಒಂದು ದಿನ ಅಂತೂ ಬೇಕು! ಹೋದ ಪ್ರತೀ ಕಡೆಲಿದೇ ಕೆಲಸ ಪಕ್ಕಕ್ಕೆ ಆವುತ್ತಾ? ಎಲ್ಲಾದಿಕ್ಕೆ ಒಂದೋ ಹನುಮಂತನ ಬಾಲದ ಹಾಂಗೆ ಕ್ಯೂ, ಅಥವಾ ಕಂಡಾಬಟ್ಟೆ ರಶ್ಶು, ಜೆಂಭರಕ್ಕೆ ಜೆನ ಸೇರಿದ ಹಾಂಗೆ! ತತ್ಪರಿಣಾಮ ಎಲ್ಲಾ ಕೆಲಸಂಗೊ ಆಮೆ ವೇಗಲ್ಲಿ ಸಾಗುದು! ಪಟ್ಟಿ ಮಾಡಿದ ಎಲ್ಲಾ ಕೆಲಸಂಗೊ ಖಂಡಿತಾ ಮುಗಿಯ ಹೇಳಿ ಗೊಂತಿದ್ದೆಂಗೊಗೆ, ಇರಾಲಿ ಮುಗುದುಷ್ಟು ಮುಗಿಯಲಿ ಹೇಳಿ ಒಂಭತ್ತು ಗಂಟೆಗೆ ಎಂಗೊ ಮನೆ ಬಿಟ್ಟರೆ, ಮಧ್ಯಾನ್ಹ ಒಂದು, ಒಂದೂವರೆ ಗಂಟೆಯ ಒಳಾದಿಕ್ಕೆ ಎಷ್ಟಾವುತ್ತೋ ಅಷ್ಟು ಕೆಲಸಂಗಳ ಮುಗುಶಿ ಮನಗೆ ವಾಪಸ್ಸು ಬಪ್ಪದು ಎಂಗಳ ವಾಡಿಕೆ! ಮತ್ತೆ ಒಳುದ್ದರ ನಾಳೆ ಹೋಗಿಯಾರೂ ಮಾಡ್ಲಕ್ಕನೇ. ಅಂಬಗ ಎರಡು ದಿನಂಗಳಲ್ಲಿ ಕೆಲಸಂಗೊ ಒಂದು ಮಟ್ಟಿಂಗೆ ಮುಗುದಾಂಗೆ ಆತಲ್ಲದಾ ಹೇಳಿ ಎಂಗಳ ಲೆಕ್ಕಾಚಾರ! ಇಷ್ಟು ಕೆಲಸಂಗಳ ಪಟ್ಟಿ ಮಾಡಿಕೊಂಡು ಎಂಗೊ ಪೇಟೆಗೆ ಹೋಯಿಕ್ಕೊಂಡಿಪ್ಪದು, ಎನ್ನ ಫ್ರೆಂಡಿಂಗೆ ಕುಶಾಲು! "ಹೆರ ರಣ ಬೆಶಿಲು, ಹೋಯೇಕ್ಕನ್ನೇ ಹೇಳಿ ಹೋಪದು, ಕೆಲಸ ಒಂದೆರಡಲ್ಲ, ನೂರೆಂಟಿದ್ದು, ಎಲ್ಲದರ ಹೊಂದಿಸಿಕೊಂಡು ಹೋವುತ್ತಾ ಇಪ್ಪದು ಮಾರಾಯ್ತಿ, ಮಜ ಅಡ ಮಜಾ, ಆತು ಬಾಯ್, ಬಂದ ಮತ್ತೆ ಮಾತಾಡುವಾ" ಹೇಳಿ ಮೆಸ್ಸೇಜು ರವಾನೆ ಮಾಡಿದೆ! "ಬಾರೆ ಸಂತೆಗೆ ಹೋಗೋಣ ಬಾ, ಸಿನೆಮಾ ಟೆಂಟಲ್ಲಿ ಕೂರೋಣ ಬಾ ಹೇಳಿ ನಿನ್ನೆಜಮಾನರು ಹೇಳಿಕೊಂಡಿಕ್ಕಲ್ಲದಾ, ಹ್ಹಹ್ಹಹ್ಹ" ಹೇಳಿ ಪುನ: ಮೆಸ್ಸೇಜು ಕಳಿಸಿ ಅದರ ಬಾಲ ಬಿಚ್ಚಿತು! ಪುಚ್ಚೆಗೆ ಆಟ, ಎಲಿಗೆ ಪ್ರಾಣಸಂಕಟ! ಇರಲಿ ಒಂದಲ್ಲಾ ಒಂದು ದಿನ ಅದು ಗೆಂಡನೊಟ್ಟಿಂಗೆ ಹೋಪಲಿದ್ದು ಎಲ್ಲಿಗಾದರೂ ಹೇಳಿ ಮೆಸ್ಸೇಜೋ, ಕಾಲೋ ಮಾಡಿ ಎನ್ನತ್ತರೆ ಹೇಳದ್ದೇ ಇರ, ಅಂಬಗ ಇದರ ಸಾಲ ತೀರ‍್ಸದ್ದೇ ಬಿಡೆ ಹೇಳಿ ಮನಸ್ಸಿಲ್ಲೇ ತೀರ್ಮಾನಿಸಿಕೊಂಡು ಇವರೊಟ್ಟಿಂಗೆ ಹೆರಟೆ! ನಿಜವಾಗಿ ಹೇಳ್ತರೆ ಮಾರ್ಕೆಟ್ಟಿಂಗೆ ಹೋಪದು ಎನಗೆ ದೊಡ್ಡ ತಲೆಬೇನೆಯ ವಿಷಯ! ಅಂದಂತೂ ಹೋಪಲೆ ಮನಸ್ಸಿತ್ತಿಲ್ಲೆ! ಪೇಟೆಲಿ ಹಲವು ಕೆಲಸಂಗೊ ಇದ್ದು ಹೇಳಿ ಅದಕ್ಕೆ ಬೇಕಾಗಿಯೇ ಇವು ಭಂಗಲ್ಲಿ ರಜೆ ಮಾಡಿದ್ದವು ಬೇರೆ! ಆನು ಇಂದು ಹೋಪದು ಬೇಡ ಹೇಳಿ ಹೇಳಿಬಿಟ್ಟರೆ ಅವು ಮತ್ತೆ ಮಾರ್ಕೆಟಿನ ಕಡೆ ಅಣಿಯವು! "ಆತಾಂಗಾರೆ ನಾಳಂಗೆ ನೀನೊಬ್ಬನೇ ಎಲ್ಲಾ ಮುಗುಶಿಯೊಂಡು ಬಾ, ಆನಿಂದು ರೆಸ್ಟ್ ತೆಕ್ಕೊಳ್ತೆ" ಹೇಳಿ ಹೇಳಿಕ್ಕಿ ಎಲ್ಲಾ ಕೆಲಸಂಗಳ ಎನ್ನೊಬ್ಬನ ತಲೆಗೆ ಕಟ್ಟಿಬಿಡುಗು! ಹಾಂಗಾದರೇ ಇನ್ನೂ ಕಷ್ಟ ಅಲ್ಲದಾ ಹೇಳಿ ಗ್ರೇಶಿಗೊಂಡು ಅಂತೂ ಅರೆಮನಸ್ಸಿಲಿ ಹೆರಟದಾನು! ಒಂದೇ ದಿನ ಇಬ್ರೂ ಹೋದರೆ, ಒಬ್ಬ ಒಂದು ಕಡೆಂಗೆ ಹೋದಿಪ್ಪಾಗ ಅಲ್ಲೇ ಹತ್ತಿರಲ್ಲಿ ಇನ್ನೊಂಬ್ಬಂಗೆ ಮತ್ತೊಂದು ಕೆಲಸ ಮಾಡ್ಲಕ್ಕನ್ನೇ, ಹೇಳಿ ಎಂಗಳ ಮಾಸ್ಟರ್ ಪ್ಲಾನ್! ಸಣ್ಣಕ್ಕೆ ನಸುಕೋಪ ಬಂದರುದೇ ಎನ್ನ ಫ್ರೆಂಡಿನ ಮೆಸ್ಸೇಜಿಲಿಪ್ಪ ಹಾಸ್ಯ ಎನ್ನ ಮಾರ್ಕೆಟ್ಟಿಂಗೆ ಹೋಪ ಅರ್ಧ ತಲೆಬೇನೆಯ ಕಡಮ್ಮೆ ಮಾಡಿತು. ಆ  ಈ ರೀತಿಯ ಹಾಸ್ಯ, ನೆಗೆ ಎಲ್ಲಾ ಬೇಕು ಮನೆವರೊಟ್ಟಿಂಗೆ, ಫ್ರೆಂಡುಗಳ ಹತ್ತರೆ, ನೆಂಟರು, ನೆರೆಕರೆವರಲ್ಲೆಲ್ಲಾ.

ಇವ್ವುದೇ ರಜ್ಜ ಹಾಸ್ಯ ಪ್ರಜ್ಞೆ ಇಪ್ಪ ವ್ಯಕ್ತಿ. ಈ ಸರ್ತಿ ಮೊದಾಲು ಎನಗೊಂದು ನೈಟಿ ತೆಗೆವಲೆ ಹೋದ್ದು! ಮನೆಲಿ ಹಾಕುವ ಎರಡು ಮೂರು ನೈಟಿಗೊ ಎಲ್ಲಾ ಹಳತ್ತಾಗಿ ಇವ್ವು ಯೇವಾಗಲೂ ಹೇಳುಗು, "ಆ ನೈಟಿಗಳ ಹಾಕುದರ ನಿಲ್ಲುಸು ಮಾರಾಯ್ತಿ, ಇನ್ನೊಂದರಿ ನೀನು ಹಾಕಿದ್ದರ ಕಂಡರೆ ಹರುದು ಹಾಕುವೆ, ಈಗಲೇ ಆ ಮಾರ್ಕೆಟ್ಟಿಂಗೆ ಹೋಪ ಲಿಸ್ಟಿಲಿ ಎರಾಡು ನೈಟಿ ಹೇಳಿ ಬರೆ" ಹೇಳಿ! ಪ್ರತೀ ಸರ್ತಿ ಮಾರ್ಕೆಟ್ಟಿಂಗೆ ಹೋದಿಪ್ಪಗಲೂ ಅಖೇರಿಗೆ ಈ ಕೆಲಸ ಮಡುಗಿ ಇನ್ನೊಂದರಿ ಬಂದಿಪ್ಪಗ ತೆಗದರಾತು, ಗಂಟೆ ಒಂದಾಯಿಕ್ಕೊಂಡು ಬಂತು, ತಡವಾತು ಹೇಳಿ ಮನಗೆ ವಾಪಸ್ಸು ಹೋಪದು! ಈ ಸಲ ಹಾಂಗಪ್ಪಲಾಗ ಹೇಳಿ ಮೊದಾಲು ಒಂದು ವಸ್ತ್ರದ ಅಂಗಡಿಗೆ ನುಗ್ಗಿದೆಯ. ಅಲ್ಲಿಯಾಣ ಸೇಲ್ಸ್ ಗರ್ಲ್‍ "ಏನು ಬೇಕು ಸಾರ್?" ಹೇಳಿ ಕೇಳಿತು. ಅದಕ್ಕಿವು ಹೇಳಿದವು, "ನೈಟಿ" ಹೇಳಿ. ಅಂಬಗ ಎನ್ನ ನೋಡಿಕೊಂಡು ಇವಕ್ಕೆ ಅದರ ಮರುಪ್ರಶ್ನೆ, "ಯಾರಿಗೆ, ಇವ್ರಿಗಾ?" ಹೇಳಿ. ಅಂಬಗ ಇವ್ವು, "ಹೌದು ಅವ್ರಿಗೇ, ಮತ್ತೆ ನಾನು ನೈಟಿ ಹಾಕುವುದಿಲ್ಲ!" ಹೇಳಿಯಪ್ಪದ್ದೇ ಅದಕ್ಕೂ, ಎನಗೂ, ಅಂಗಡಿಯವಕ್ಕೂ ನಗುವೋ ನಗು! ಆ ಹುಡುಗಿ ಎಂಗೊ ನೈಟಿ ತೆಕ್ಕಂಡು ಹೆರ ಬಪ್ಪಗಲೂ ನೆಗೆ ಮಾಡಿಯೊಂಡೇ ಇದ್ದತ್ತು! ಅಂತೂ ಇಂತೂ ಮುಕ್ಕಾಲುವಾಶಿ ಕೆಲಸಂಗಳ ಮುಗುಶಿ ಮನಗೆ ಎತ್ತಿಯಪ್ಪಗ ಗಂಟೆ ಒಂದೂವರೆ ಆಗಿತ್ತು. ಕೈಕಾಲು ತೊಳದು ಉಂಬಲೆ ಅಣಿ ಮಾಡಿ ಇವಕ್ಕೆ ಮಾಂತ್ರ ಬಟ್ಟಲು ಮಡುಗಿದೆ. ಅಂಬಗ ಇವು, "ನಿನಗೆಲ್ಲಿದ್ದು ಬಟ್ಟಲು?" ಹೇಳಿ ಕೇಳಿದವು. ಆನು ಹೇಳಿದೆ, "ಮಾರ್ಕೆಟಿಲಿ ಅರ್ಧ ಗಂಟೆಗೆ ಮೊದಾಲು ಬೊಂಡ ಕುಡುದ್ದಲ್ಲದಾ, ಎನಗೆ ಹಶು ಅಡಗಿದ್ದು, ನಿಂಗೊ ಉಣ್ಣಿ, ಆನು ಮತ್ತೆ ಉಣ್ತೆ" ಹೇಳಿ. ಹೆಚ್ಚಾಗಿ ಎನಗೆ ಉದಿಯಪ್ಪಗ ಕಾಫಿ ತಿಂಡಿಗಪ್ಪಗಳೋ, ಮಧ್ಯಾನ್ಹ, ಇರುಳು ಊಟಕ್ಕಪ್ಪಗಳೋ ಎಂತಾರೂ ಎಷ್ಟೇ ಕಡಮ್ಮೆ ಪ್ರಮಾಣಲ್ಲಿ ತಿಂದರೂ, ಕುಡುದರೂ ಹಶು ಅಡಗಿಬಿಡ್ತು, ಮತ್ತೆ ಒಂದು ಗಂಟೆ ಕಳುದಪ್ಪಗ ಹಶು ಶುರುವಾಗಿ ತಿಂಬದು! ಹೀಂಗಪ್ಪಗ ನಿತ್ಯ ಉಂಬ ಹೊತ್ತು ತಪ್ಪಿ ಹೋಗಿ ದಿನಚರಿಯೇ ಅಸ್ತವ್ಯಸ್ತ ಆಗಿಬಿಡ್ತು. "ಆನು ಹಶು ಅಪ್ಪಗ ಉಂಬೆ ನಿಂಗೊ ಉಣ್ಣಿ" ಹೇಳಿ ಪುನ: ಹೇಳಿದೆ! ಇವು ಉಂಬಲೆ ಕೂಪದು ಬಿಟ್ಟು ಇಡೀ ಮನೆಯ ಮೂಲೆ ಮುಡುಕಿನ, ಕಪಾಟಿನೆಡೆಲಿ, ಮಂಚದಡಿ, ಫ್ರಿಡ್ಜಿನ ಬಾಗಿಲು ತೆಗದು ಎಲ್ಲಾ ಎಂತರನ್ನೋ ಹುಡುಕುಲೆ ಶುರುಮಾಡಿದವು! "ಎಂತರಾ ಅದು ಹುಡುಕುದು ನಿಂಗೊ" ಹೇಳಿ ಕೇಳಿಯೇ ಬಿಟ್ಟೆ. "ಆನು ನಿನ್ನ ಹಶುವಿನ ಹುಡುಕುತ್ತಾ ಇಪ್ಪದು ಮಾರಾಯ್ತಿ, ಅದು ಎಲ್ಲಿ ಅಡಗಿ ಕೂಯ್ದು ಹೇಳಿ!" ಹೇಳಿಯಪ್ಪಗ ಆರಿಂಗೆ ತಾನೆ ನೆಗೆ ಬಾರದಿಪ್ಪದು? ಇವರ ಈ ಕುಶಾಲು ಮಾರ್ಕೆಟ್ಟಿಂಗೆ ಹೋದ ಅರ್ಧ ಬಚ್ಚಲಿನ ಮರೆಶಿತು! ಇಂತಾ ಹತ್ತು ಹಲವು ಸಂದರ್ಭಂಗಳಲ್ಲಿ ಇವ್ವು ಇಂತಾ ವಾತಾವರಣಂಗಳ ಮನೆ ಒಳಾದಿಕ್ಕೆ ಸೃಷ್ಠಿಸಿ ಎಂಗಳೆಲ್ಲಾ ನೆಗೆ ಮಾಡಿಸ್ತಾ ಇರ‍್ತವು! ಕಷ್ಟಪಟ್ಟು ಮಾಡಿದ ಅಡುಗೆಯ ಮಕ್ಕೊ ತಿನ್ನದ್ದೇ, ಕುಡಿಯದ್ದೇ ಇಪ್ಪಾಗ ಮಹಾ ಕೋಪ ಬತ್ತಲ್ಲದಾ? ಬಂದ ಕೋಪಲ್ಲಿ ಬೈದ ಮತ್ತೆ ತಿಂತವ? ಕುಡಿತ್ತವಾ? ಇಲ್ಲೆನ್ನೇ? ಆನೀಗ ಬೈವದರ ಬಿಟ್ಟು ಕುಶಾಲು ಮಾಡಿಯೇ ಅವರ ಮನಸ್ಸಿನ ಗೆಲ್ಲುವ ಪ್ರಯತ್ನ ಮಾಡ್ತಾ ಇದ್ದೆ! ಓ ಮೊನ್ನೆ ಒಂದರಿ ಗ್ಲಾಸಿಂಗೆ ಎರದು ಕೊಟ್ಟ ಹಾಲಿನ ಟೀಪಾಯಿಯ ಮೇಲೇ ಮಡುಗಿ ಕುಡಿಯದ್ದೇ ಕಾಲೇಜಿಂಗೆ ಹೋಗಿತ್ತು ಮಗಳು. ಆ ಗ್ಲಾಸಿನ ನೋಡಿದ ಕೂಡ್ಲೇ ಕೋಪ ಬಂದು, "ಇವಕ್ಕೆಲ್ಲಾ ಕಾಲು ಬುಡಕ್ಕೊರೆಗೆ ತಂದು ಕೊಟ್ಟರುದೇ ಕುಡಿವಲೆಡಿತ್ತಿಲ್ಲೆ, ಮತ್ತೆ ಅಲ್ಲಿ ಬಚ್ಚುತ್ತು, ಇಲ್ಲಿ ಬಚ್ಚುತ್ತು ಹೇಳಿ ಹೇಳುದು, ಎಂಗೊಲ್ಲಾ ಹೀಂಗೆ ಮಾಡಿಯೊಂಡಿತ್ತಿಲ್ಲೆಪ್ಪಾ, ಕೊಡದ್ದರೆ ಕೇಳಿ ಕುಡುಕೊಂಡಿತ್ತೆಯ.....ಮಾಡಿಕೊಡುದು ಹೆಚ್ಚಾತು...ಹೊತ್ತಪ್ಪಗ ಬತ್ತನ್ನೆ, ನೋಡಿಕೊಳ್ತೆ..." ಅದರ ಅನುಪಸ್ಥಿತಿಲಿ ಎನ್ನ ಆವೇಶದ ಮಾತುಗೊ ಹೆರ ಬಂದೊಂಡೇ ಇತ್ತು! ಉಪಶಮನ ಆದ ಮತ್ತೆ ಮೊಬೈಲು ತೆಕ್ಕೊಂಡು ಮಗಳಿಂಗೆ ಒಂದು ಸಂದೇಶ ಟೈಪ್ ಮಾಡಿದೆ. "ಟೀಪಾಯ್ ಮೇಲೆ ಕುಡಿವಲೆ ಹೇಳಿ ತಂದು ಮಡುಗಿದ ಹಾಲಿನ ಕುಡಿಯದ್ದೇ ಹೋದೆನ್ನೆ ಮಂಗಾ!" ಹೇಳಿ. ಕಳುಸುವ ಮೊದಾಲು ಒಂದರಿ ಓದಿ ನೋಡಿದೆ. ಎಂತಕೋ ಮನಸ್ಸು ಇದೇ ಮೆಸ್ಸೇಜಿನ ರಜ್ಜ ಹಾಸ್ಯಲ್ಲಿ ಕಳಿಸಿರೆ ಹೇಂಗೆ ಹೇಳಿ ಎನ್ನತ್ತರೆ ಕೇಳಿತು. ಅದರ ಕೋರಿಕೆಗೆ ಮಣಿದು ’ಮಂಗಾ’ ಹೇಳಿ ಟೈಪ್ ಮಾಡಿದ್ದರಲ್ಲೇ ಸಣ್ಣ ತಿದ್ದುಪಡಿ ಮಾಡಿದೆ. ಮ(ಂ)ಗಾ ಹೇಳಿ ಮಾಡಿ ಕಳಿಸಿದೆ! ಅಂಬಗ ಮಗಳಿನ ಒಂದು ಪೀರಿಯಡ್ ಮುಕ್ಕೊಂಡು ಬಂದ ಕಾರಣ ಮೊಬೈಲಿಲಿ ಎನ್ನ ಮೆಸ್ಸೇಜಿನ ನೋಡಿ ಭಾರೀ ಖುಷಿಲಿ ಎನಗೆ ಉತ್ತರ ಕೊಟ್ಟತ್ತು, "ಹ್ಹಹ್ಹಹ್ಹ ಎನ್ನ ಮುದ್ದು ಅಮ್ಮಾ, ಮರತು ಹೋತು ಕುಡಿವಲೆ, ಕಾಲೇಜಿಂದ ಮನೆಗೆ ಬಂದ ಕೂಡ್ಲೇ ಎರಡು ಗ್ಲಾಸ್ ಹಾಲು ಕುಡಿತ್ತೆ, ಡೋಂಟ್ ವರಿ ಬೇಬಿ" ಹೇಳಿ! ಎನಗೆ ಬಂದ ’ಆ’ ಕೋಪದೇ ಇದರ ಮೆಸ್ಸೇಜು ನೋಡಿ ಓಡಿ ಹೋತು! ಮಗಳಿಂಗೆ ಎನ್ನ ಮೆಸ್ಸೇಜಿಲಿಪ್ಪ ಹಾಸ್ಯದೇ ಹಾಂಗೆ ಅದರ ಮೇಲಿಪ್ಪ ಕಾಳಜಿ ಇಪ್ಪದು ಗೊಂತಾಗಿ ಭಾರೀ ಖುಷಿ ಆಗಿತ್ತು. ಕಾಲೇಜು ಮುಗುಶಿ, ಗೇಟಿನ ಹತ್ತರೆ ಬಪ್ಪಾಗಲೇ, "ಅಮ್ಮಾ, ನಿನ್ನ ಹಾಸ್ಯ ಪ್ರಜ್ಞೆಗೆ, ನಿನ್ನ ಕಾಳಜಿಗೆ ಆನು ಶರಣು, ಫ್ರೆಂಡುಗೊಕ್ಕೆಲ್ಲಾ ಹೇಳಿದೆ ನಿನ್ನ ಮೆಸ್ಸೇಜಿನ, ಅವ್ವು ಕೂಡಾ ನೆಗೆ ಮಾಡಿದವು ಗೊಂತಿದ್ದಾ?... ಕೊಡು ಆ ಎರಡು ಗ್ಲಾಸ್ ಹಾಲಿನ ಈಗಲೇ ಕುಡಿತ್ತೆ" ಹೇಳಿ ಎನ್ನ ಪ್ರಜ್ಞೆ ತಪ್ಪುವ ಹಾಂಗೆ ಮಾಡಿತು! ಹಾಂಗೇ ಈ ಹಾಸ್ಯ ಪ್ರಜ್ಞೆ ಎಂಗೊಳೆಲ್ಲರ ಬಾಳಿಲಿ ಹಾಸುಹೊಕ್ಕಾಗಿದ್ದರೆ ಮನಸ್ಸು, ದೇಹ, ಪರಿಸರ ಎಲ್ಲಾ ಹಸನಾಗಿರ‍್ತು. 

ಜೀವನಲ್ಲಿ ಒಬ್ಬನ ಒಬ್ಬ ಚೆಂದಕ್ಕೆ ಮಾತಾಡ್ಸಿಯೊಂಡು, ಅವಕ್ಕೆ ಬೇನೆ ಆಗದ್ದ ಹಾಂಗೆ ಮಾತಿಲಿ ಹಾಸ್ಯ ಪ್ರಜ್ಞೆ ಬೆಳೆಶಿಯೊಂಡು, ನೆಗೆ ಮಾಡಿಯೊಂಡು, ಸಂತೋಷಂದ ಇದ್ದರೆ ಅದುವೇ ದೊಡ್ಡ ವರ, ದೇಹದ ಆರೋಗ್ಯಕ್ಕೂ ಮೂಲ. ಹೀಂಗೆಲ್ಲಾ ಇದ್ದರೆ ಆರೋಗ್ಯ ಹೇಳಿ ಹೇಳುದರ ನಾವೆಲ್ಲಾ ಎಷ್ಟೋ ಕಡೆ ಕೇಳಿ, ಓದಿ ತಿಳುಕೊಂಡಿದಲ್ಲದಾ? ನಗುವು ಸಹಜ ಧರ್ಮ, ನಗಿಸುವುದು ಪರಧರ್ಮ, ನಗುವ ಕೇಳುತ ನಗುವುದು ಅತಿಶಯದ ಧರ್ಮ, ನಗುವ, ನಗಿಸುವ, ನಗಿಸಿ, ನಗುತ ಬಾಳುವ ವರವ ಮಿಗೆ ನೀನು ಬೇಡಿಕೊಳ್ಳೋ ಮಂಕುತಿಮ್ಮ - ಕವಿ ಡಿ.ವಿ.ಗುಂಡಪ್ಪ ಬರದ ಈ ಕವನದ ಸಾಲುಗಳಲ್ಲಿ ಎಷ್ಟು ಅರ್ಥ ಇದ್ದಲ್ಲದಾ?


ತ್ರಿವೇಣಿ ವಿ ಬೀಡುಬೈಲು,
ಮಂಗಳೂರು.