"ಮಳೆಗಾಲಲ್ಲಿ ಒಂದು ದಿನ" - ಹವ್ಯಕ ಕನ್ನಡದಲ್ಲಿ ನಾನು ಬರೆದ ಮೊದಲ ಮತ್ತು ಏಕೈಕ ಕವನ

ಮಳೆಗಾಲಲ್ಲಿ ಒಂದು ದಿನ

ಮಳೆಗಾಲದ ಒಂದು ಹಗಲಿಲಿ
ಗಿಡಮರಂಗೊ ಇಳೆ ಎಲ್ಲಾ ನೆನದು ಮೀವದರ ಕಾಂಬಾಶೆ
ತೋಡು ಕೆರೆ ಹೊಳೆ ತುಂಬಿ ಹರಿವುದರ ಕಣ್ತುಂಬಿ
ಕಾರ್ಮುಗಿಲ ವರ್ಷಧಾರೆಲಿ ನಡದು
ಕಡಲಬ್ಬರವ ಹೊಂಬಣ್ಣದ ಅಲೆಗಳಲಿ ನೋಡುವಾಶೆ

ಮಳೆಗಾಲದ ಒಂದು ಇರುಳಿಲಿ 
ಇರಿಂಟಿ ಕೆಪ್ಪೆಗಳ ಸ್ವರಲ್ಲಿ ಮಳೆಯ ಮುನ್ಸೂಚನೆ ಕೇಳುವಾಶೆ
ಮಿಂಚಿನ ಬೆಣ್ಚಿಲಿ ಪ್ರಕೃತಿಯ ಚಿತ್ರವ ಕಣ್ತುಂಬಿ
ಗುಡುಗು ಮಿಂಚಿನ ಬಿರುಗಾಳಿ-ಮಳೆಗೆ ಕೆಮಿಗೊಟ್ಟು
ಬೆಶ್ಚಂಗೆ ಗುಡಿಹಾಕಿ ಮನುಗುವಾಶೆ

ಮಳೆಗಾಲದ ಉದಿಯಕಾಲಲ್ಲಿ
ಗಿಡಂಗಳ ಮೇಲಿಪ್ಪ ನೀರಮುತ್ತುಗಳ ಮುಟ್ಟುವಾಶೆ
ನೀರವ ಮೌನಲ್ಲಿ ಬಗೆಬಗೆ ಹಕ್ಕಿಗಳ ದನಿ ಕೇಳಿ
ಪಿರಿಪಿರಿ ಮಳೆಗೆ ಮೈಯೊಡ್ಡಿ ಮಾಡನೀರಿಂಗೆ ಕೈಯೊಡ್ಡಿ  
ಚಳಿಗೊಂದರಿ ನಡುಗಿ ಕೆಂಪು ಕೆಂಡಕ್ಕೆ ಮೈಯೊಡ್ಡುವಾಶೆ

ಮಳೆಗಾಲಲ್ಲಿ ಒಂದು ದಿನ
ಹಗಲು ಹೊತ್ತಿಲೇ ಕಸ್ತಲಪ್ಪದರ ಕಾಂಬಾಶೆ
ಹಕ್ಕಿ ದನಕಂಜಿಗಳ ಗೂಡು ಸೇರುವ ತವಕವ ಕಂಡು
ಮತ್ತೆ ಮುಗಿಲೆಲ್ಲಾ ಸರಿದೊಂದರಿ ಕಸ್ತಲೆ ಬೆಳಕಾಗಿ
ಹೊತ್ತು ಮುಳುಗುವಂದಾಜಿಗೆ ಕಾಮನಬಿಲ್ಲ ಕಾಂಬಾಶೆ

ಎನ್ನ ಒಂದು ದಿನದ ಆಶೆಗೊ ಒಳುದುಹೋಕೋ ಹೇಂಗೆ?
ಮರಂಗಳೆಲ್ಲಾ ಈಗಲೇ ಕಡುದು ಬುಡಮೇಲು ಮಾಡಿದರೆ ಹೀಂಗೆ?
ಕೆರೆ ಹೊಳೆ ಜಲಾಶಯಂಗೊ ಹೂಳು ತುಂಬಿ ಹರಿವುದೆಲ್ಲಿಗೆ ಮತ್ತೆ?
ಆಕಾಶಲ್ಲಿ ಮುಗಿಲು ಕಂಡರೆ ಸಾಕೋ ಹೇಳಿ-ಮತ್ತೆ?
ಕಾರ್ಮುಗಿಲು ಕಂಡರೆ ಸಾಕೋ? ಪಶುಪಕ್ಷಿಗೊ ಗೂಡು ಸೇರಿದರೆ ಸಾಕೋ?
ಇರಿಂಟಿ ಕೆಪ್ಪೆಗೊ ಮಳೆಯ ದಿನಿಗೇಳಿದರೆ ಸಾಕೋ?

ಭೂಮಿತಾಯ ಒಡಲ ಮಾಡೇಕು ನಾವು ಹಸುರು ಹಸುರು
ಅಂಬಗ ಮಾಂತ್ರ ನಮಗೆಲ್ಲಾ ಸಿಕ್ಕುಗಷ್ಟೇ ಒಸರು ಉಸುರು
ಕಾಡೇ ಇಲ್ಲದ್ದರೆ ನಾಡಿಲಿ ಮಿಂಚಿನ ಬೆಣ್ಚಿಲಿ ಕಾಂಬದೆಂತರ?
ನಿರಂತರ ತಿರುಗುವ ಭೂಮಿ ನಿಂದು ಹೋದರೆ ಮಾಡುದೆಂತರ?

ತ್ರಿವೇಣಿ ವಿ ಬೀಡುಬೈಲು 
ಮಂಗಳೂರು