ಮನೆ ಮನೆ ಶುದ್ಧಿ ಅಷ್ಟೆ...!
ಎನ್ನ ಕೈರಟ್ಟೆಲಿ ರಿಂಗ್ವರ್ಮ್(ಹುಳುಮೇವದು) ಆದ ಕಾರಣ ಗೊಂತಿಪ್ಪ ಮನೆಮದ್ದುಗಳ ಎಲ್ಲಾ ಒಂದು ತಿಂಗಳಿಡೀ ಮಾಡಿ ಸೋತು ಕಡೇಂಗೆ ಸ್ಕಿನ್ ಸ್ಪೆಷಲಿಸ್ಟಿನ ಹತ್ತರೆ ಹೋಯೇಕ್ಕಾಗಿಯೇ ಬಂತು. ಅಲ್ಲಾ, ಈ ಮನೆಮದ್ದುಗಳ ಎಲ್ಲಾ ಕೇಳಿದ್ದರ, ನೋಡಿದ್ದರ, ಓದಿದ್ದರ ಎಲ್ಲಾ ತಪ್ಪದೇ ಮಾಡಿತ್ತಿದ್ದೆ ಹೇಳಿ! ಆದರೆ ರಿಂಗ್ವರ್ಮಿಂಗೂ, ಆನು ಮಾಡಿದ ಔಷಧಿಗೊಕ್ಕೂ ಎಂತಕ್ಕೋ ಸಮ ಬೈಂದಿಲ್ಲೆ ಹೇಳಿ ಕಾಣುತ್ತು! ಮದ್ದು ಮದ್ದಿನಷ್ಟಕ್ಕೇ, ರಿಂಗ್ವರ್ಮ್ ಅದರಷ್ಟಕ್ಕೇ. ಹೆಚ್ಚಾಯ್ದೂ ಇಲ್ಲೆ, ಕಡಮ್ಮೆ ಆಯ್ದೂ ಇಲ್ಲೆ! ಈಗ ಎಲ್ಲಾ ರೋಗೊಂಗೊಕ್ಕುದೇ ಎಷ್ಟು ದೊಡ್ಡಸ್ಥಿಕೆ ಬೈಂದು ಹೇಳಿದರೆ ಮನೆಮದ್ದೆಲ್ಲಾ ಅವಕ್ಕೆ ಬೇಡವೇ ಬೇಡಾ ಹೇಳಿ! ದೊಡ್ಡ ದೊಡ್ಡ ಡಾಕ್ಟರಕ್ಕಳ ಹತ್ತರೆ ಹೋಗಿ ಕೇಳಿದಷ್ಟೂ ಪೈಸೆಯ ಅವಕ್ಕೂ, ಅಂಗಡಿಯ ಮದ್ದಿಂಗೂ ಸುರುಗಿದರೆ ಮಾಂತ್ರ ಆ ಬಂದ ರೋಗಕ್ಕೂ ಸಮಾಧಾನ ಹೇಳಿ ಕಾಣುತ್ತು! ಮತ್ತೆ ಎಡ್ರೆಸ್ ಇಲ್ಲದ ಹಾಂಗೆ ರಜ್ಜ ದಿನಕ್ಕೆ ದೂರ ಹೋವುತ್ತು!
ಆನು ಎನ್ನ ತೊಂದರೆಯ ತೆಕ್ಕೊಂಡು ಚರ್ಮದ ಡಾಕ್ಟ್ರೆತ್ತಿ ಹತ್ತರೆ ಹೋದೆ. "ಕ್ಲೀನ್ಲಿನೆಸ್ ಕೌಂಟ್ಸ್ ಎವ್ವರಿವ್ಹೇರ್, ಡೋಂಟ್ ಫೊರ್‌ಗೆಟ್ ಬಿಹೈಂಡ್ ಯುವರ್ ಇಯರ‍್ಸ್" ಹೇಳಿ ಕ್ಲಿನಿಕ್ಕಿನ ಗೋಡೆಲಿ ನೇಲಿಸಿಯೊಂಡಿದ್ದ ಬೋರ್ಡಿನ ಮೇಲೆ ಎನ್ನ ಕಣ್ಣು ಬಿತ್ತು. ಇದನ್ನೇ ಒಂದರಿ ಎನ್ನ ಇಂಗ್ಲಿಷ್ ಲೆಕ್ಚರರ್ ಪಾಠ ಮಾಡುವಾಗ ಹೇಳಿತ್ತಿದ್ದವು, ಆನು ಕಾಲೇಜಿಂಗೆ ಹೋಯಿಕ್ಕೊಂಡಿಪ್ಪಾಗ. ಅಂದು ಲಾಗಾಯ್ತು ಆನು ಕೆಮಿ ಹಿಂದೆ ತಿಕ್ಕದ್ದ ದಿನವೇ ಇಲ್ಲೆ ಹೇಳಿ ಹೇಳುಲಕ್ಕು! ಎಂತಕೆ ಹೇಳಿರೆ ಲೆಕ್ಚರರ್ ಹೇಳಿತ್ತವು ನಾವು ಮೋರೆ ತೊಳವಾಗಲೋ, ಮೀವಾಗಲೋ ಹೆಚ್ಚಾಗಿ ನಿರ್ಲಕ್ಷಿಸಿ ಹೋಪದು ಕೆಮಿಯ ಹಿಂದಾಣ ಹೊಡೆಡ. ಈ ವಾಕ್ಯದ ಅರ್ಥ ಎಂತ ಹೇಳಿದರೆ ನಾವು ದೇಹದ ಪ್ರತಿಯೊಂದು ಭಾಗವ ಲಾಯ್ಕಲ್ಲಿ ತೊಳದರೂ, ಕೆಮಿಯ ಹಿಂದೆ ತಿಕ್ಕುಲೆ ಮರದು, ದಿನ ಕಳೆದ ಹಾಂಗೆ ಅಲ್ಲಿ ಮಣ್ಣು, ಧೂಳಿನ ಶೇಖರಣೆ ಆಗಿರುತ್ತು. ಏವಾಗಲೋ ಒಂದರಿ ಅಲ್ಲಿ ತೊರುಸುವಾಗ ಗೊಂತಾವುತ್ತು ಕೆಮಿಯ ಹಿಂದೆ ಕೈಹೋಗದ್ದೇ ದಿನ ಸುಮಾರಾಯಿದು ಹೇಳಿ! ಮೀವಾಗ ಕೆಮಿಯ ಹಿಂದೆಯೂ ತಿಕ್ಕಿತೊಳದರೆ ನಮ್ಮ ದೇಹ ಪೂರ್ತಿ ಕ್ಲೀನ್ ಆವುತ್ತು. ಹಾಂಗೇ ನಾವು ಮನೆಲೇ ಆಗಲಿ, ನಮ್ಮ ಕೆಲಸದ ಸ್ಥಳಂಗಳಲ್ಲೇ ಆಗಲಿ ಕ್ಲೀನ್ ಮಾಡುವಾಗ ಮೂಲೆ-ಮುಡುಕು, ಸಂದು-ಗೊಂದುಗಳ ಎಲ್ಲಾ ಪ್ರತಿನಿತ್ಯ ಕ್ಲೀನ್ ಮಾಡಿ ಲಾಯ್ಕಲ್ಲಿ ಮಡಿಕ್ಕೊಳ್ಳದ್ದರೆ ಎದುರು ಕಾಂಬಲ್ಲಿ ಮಾತ್ರ ಕ್ಲೀನ್ ಕಾಣುತ್ತು. ಕಾಣದ್ದಲ್ಲಿ ಕಸವು ಹಾಂಗೆ ಒಳಿತ್ತು, ಕ್ಲೀನ್ ಹೇಳುತ್ತ ಪದ ಎಲ್ಲಾದಿಕ್ಕು ಕಾರ್ಯರೂಪವಾಗಿ ಅನ್ವಯ ಆಯೇಕ್ಕು ಹೇಳಿ ಈ ವಾಕ್ಯದ ಅರ್ಥ. ಲೆಕ್ಚರರ್ ಅಂದು ಹೇಳಿದ್ದ ಸಾಲುಗಳ ಗೋಡೆ ಮೇಲೆ ಓದಿಯಪ್ಪಗ ಹಲವು ಪ್ರಸಂಗಗಳ ಕಣ್ಣಾರೆ ನೋಡಿದ್ದು ಗ್ರೇಶಿ ಎನಗೆ ಸಣ್ಣಕ್ಕೆ ನೆಗೆದೇ ಬಂತು! ಒಬ್ಬೊಬ್ಬ ಹಾಕುವ ಬೆಳಿ ಬಣ್ಣದ ಬನಿಯನ್ನಿನ, ಸುತ್ತುವ ಪಂಚೆಗಳ ನೋಡೇಕು, ನೀರಿಂಗೆ ತೋರಿಸುತ್ತವೋ ಇಲ್ಲೆಯಾ ಹೇಳಿ ಸಂಶಯ ಬತ್ತು! ಕಾಲಕ್ರಮೇಣ ಹೊಂಬಣ್ಣಕ್ಕೆ ತಿರುಗಿರುತ್ತು. ಎಲ್ಲಿಂದಾದರೂ ಹರಿವೆ ಬಿತ್ತಿನ ತಂದು ಉದುರಿಸಿತ್ತು ಹೇಳಿ ಆದರೆ ಅದರ ಮೇಲೆ ಲಾಯ್ಕಲ್ಲಿ ಗಿಡ ಹುಟ್ಟಿ ಬಕ್ಕು, ಯೇವ ರಸಗೊಬ್ಬರಂಗಳ ಸಹಾಯ ಇಲ್ಲದ್ದೇ! ಅದು ಬಿಡಿ ಅವು ಪಾಪ ಗೆಂಡುಮಕ್ಕೊ! ಕೆಲವು ಹೆಮ್ಮಕ್ಕೊ ಅಡಿಗೆ ಮನೆಲಿ ಎಷ್ಟು ಎಕೊನಮಿ ಮಾಡ್ತವು ಹೇಳಿರೆ ಅಲ್ಲೇ ಹತ್ತರೆ ಬೈರಾಸವನ್ನೋ, ಕೈಹರುಕ್ಕನ್ನೋ ಮಡಿಕ್ಕೊಳ್ಳದ್ದೇ, ಕೈಗೆಂತಾರೂ ಹಿಡ್ತು, ರವಸುತ್ತು ಹೇಳಿಯಾದರೆ, ಹಾಕಿದ ನೈಟಿಯ/ಸೀರೆಯ ಬಲದ, ಎಡದ ಹೊಡೆಂಗೇ ಕೈಉದ್ದುದು, ಕೈಯ ಚಂಡಿಯ ಉದ್ದಿಕೊಂಬದೂ ಅದೇ ಜಾಗಗೆ! ಅರ್ಜೆಂಟಿಂಗೆ ಚೆಂಡಿ ಇಪ್ಪ ಪಾತ್ರೆಗ್ಲಾಸುಗಳ ಉದ್ದುದೂ ಅಲ್ಲಿಗೆ! ಹಾಂಗೇ ನೈಟಿ/ಸೀರೆಯ ಕೈ ಉದ್ದಿದ ಹೊಡೆಯ ಬಣ್ಣವೇ ಬದಲಿರುತ್ತು! ಎಷ್ಟು ತಿಕ್ಕಿ ತೊಳದರುದೇ ನೈಟಿಯ/ಸೀರೆಯ ಆ ಒಂದಷ್ಟು ಜಾಗೆ ಮಾಂತ್ರ ಎದ್ದು ಕಂಡೊಂಡಿರುತ್ತು! ಇನ್ನೂ ಕೆಲವು ಜೆನ ಬೈರಾಸ, ಕೈಹರುಕ್ಕನ್ನೋ ಮಡಿಕೊಂಡಿರ‍್ತವು. ಅಂದರೂ ಕೈ ಮಾಂತ್ರ ಹೋಪದು ಹಾಕಿದ ವಸ್ತ್ರದ ಹೊಡೆಂಗೇ! ಬೈರಾಸಂದ ಹೆಚ್ಚು ಬೇಗ ಸಿಕ್ಕುದು ಹಾಕಿದ ವಸ್ತ್ರವೇ ಅಲ್ಲದೋ?! ಕೆಲವು ಜೆನ ನೋಡ್ಲೆ ಕ್ಲೀನ್ ಕಾಣುತ್ತವು, ಅಂತಾ ಕೆಲವರ ತಲೆ ಬಾಚುವ ಬಾಚಣಿಗೆಯೋ, ಸಿಂಕೋ, ಟಾಯ್ಲೆಟ್ಟೋ, ಉಪಯೋಗಿಸುವ ಬಾಲ್ದಿ, ಮಗ್ಗುಗಳೋ, ಬಾತ್ ರೂಮಿನ ನೆಲವೋ, ಸಾಬೂನು ಪೆಟ್ಟಿಗೆಯೋ, ಉಪಯೋಗಿಸುವ ಹಸೆವಸ್ತ್ರಂಗಳೋ, ದೇವರ ಪಾತ್ರಂಗಳೋ, ಕೆಲವರ ಮನೆಯ ಸುತ್ತುಮುತ್ತ, ಜಾಲು ಎಲ್ಲಾ ನೋಡಿದರೆ ಸಂದೇಹ ಬತ್ತು, "ಮನೆಯೊಳ ಜೆನ ವಾಸ ಇದ್ದೋ, ಇಲ್ಲೆಯಾ" ಹೇಳಿ! ಕೆಲವುದಿಕ್ಕೆ ಎಲ್ಲಾ ಮಿಕ್ಸಿ, ಗ್ರೈಂಡರುಗಳ ಹೊಡೆಲೆಲ್ಲಾ ಒಂದು ದಿನದ ಸಾಂಬಾರಿಂಗೆ ಬೇಕಾದ ಮಸಾಲೆ ಅಂಟಿಯೊಂಡಿರುತ್ತು! ಇನ್ನೂ ಕೆಲವುದಿಕ್ಕೆ ಪ್ರಿಡ್ಜ್ ಬಾಗಿಲು ತೆಗದಪ್ಪಗ ಹೊಟ್ಟೆತೊಳಸುವ ಹಾಂಗೆ ವಾಸನೆ ಬತ್ತು! ಅಟ್ಟ ಅಂತೂ ಹೆಚ್ಚಿನವರ ಮನೆಲಿ ನಿರ್ಲಕ್ಷ್ಯಕ್ಕೆ ಒಳಪಟ್ಟ ತಾಣ!....ಸಾಕು ಇಲ್ಲಿಗೇ ನಿಲ್ಸುತ್ತೆ. ಪೂರಾ ಹೇಳುಲೆ ಹೆರಟರೆ ಎಲ್ಲೋರಿಂಗೂ ಒಂದೊಂದು ನಮೂನೆಲಿ ಬೇಜಾರಕ್ಕು......!ಪ್ರಾಯ ಆದವ್ಕೆ, ಪಾಪ ಮಕ್ಕೊ ಪರವೂರಿಲ್ಲಿಪ್ಪವ್ಕೆ, ಅವರ ಶಾರೀರಿಕ ಅಸೌಖ್ಯದ ಕಾರಣ, ಆರೋಗ್ಯದ ಏರುಪೇರುಗಳಿಂದಾಗಿ ಕೆಲಸಂಗಳ ಮಾಡಿಯೊಂಬಲೆ ಮಹಾ ಭಂಗ ಆವುತ್ತು, ಅವರ ಹೊರತು ಪಡಿಸಿ ಆನು ಹೇಳಿದ್ದು...
"ನಂಬ್ರ ಎಂಟು ಬನ್ನಿ ಮೇಡಂ" ಹೇಳಿ ಹೇಳಿತು ಕ್ಲಿನಿಕ್ಕಿನ ರಿಸಿಪ್ಸನಿಸ್ಟ್. ಆಲೋಚನೆಗೊಕ್ಕೆಲ್ಲಾ ಫುಲ್‍ಸ್ಟಾಪ್ ಹಾಕಿ ಒಳ ಹೋದೆ. ಡಾಕ್ಟ್ರೆತ್ತಿ ಪರೀಕ್ಷೆ ಮಾಡಿ ಹೇಳಿದವು, "ನೋಡೀ, ಇದಕ್ಕೆಲ್ಲಾ ಚರ್ಮವನ್ನು ಕ್ಲೀನಾಗಿ ಇಟ್ಟುಕೊಳ್ಳಬೇಕು! ದಿನಕ್ಕೆರಡು ಸಲ ಸ್ನಾನ ಮಾಡಿ, ಈ ಕ್ರೀಂ, ಪೌಡರ್ ಎಲ್ಲಾ ಹಾಕಿ, ಹತ್ತು ದಿನ ಎರಡು ಹೊತ್ತು ಈ ಮಾತ್ರೆ ತಿನ್ನಿ, ವಾಸಿ ಆಗದಿದ್ದರೆ ಮತ್ತೆ ಬನ್ನಿ" ಹೇಳಿ! ಫೀಸ್ ಕೊಟ್ಟು ಮದ್ದೆಲ್ಲಾ ತೆಕ್ಕೊಂಡು ಹೆರ ಬಂದೆ. ಒಂದರಿಯಂಗೆ ಡಾಕ್ಟ್ರೆತ್ತಿ ಮೇಲೆ ಕೋಪ ಬಂದ ಹಾಂಗಾತು! ಅಲ್ಲಾ ಎನಗೇ ಎರಡು ಸಲ ಮೀವಲೆ ಹೇಳುತ್ತವನ್ನೇ?! ದಿನಕ್ಕೆರಡು ಸಲ ಮೀವ ಆನು, ಬೇಕಾದರೆ ಮೂರು ಸಲವೂ ಮೀವೆ, ನೀರೆರಕ್ಕೊಂಬಲೆ ಎಂತ ಮಹಾ ಭಂಗ ಇದ್ದಾ?! ಸಣ್ಣಾದಿಪ್ಪಾಗ ಎನ್ನ ಮೀಶುಲೆ ಹೇಳಿ ಕರಕೊಂಡುಹೋದರೆ ಬೆಶಿನೀರ ಕೊಟ್ಟಗೆಂದ ಆನು ಹೆರ ಬಪ್ಪಲೆ ಕೇಳಿಯೊಂಡಿತ್ತಿಲ್ಲೆಡ, ಅಮ್ಮ ಈಗಲೂ ಹೇಳಿಯೊಂಡಿರ‍್ತು!
ದಿನಲ್ಲಿ ಮೂರು ಸಲವೂ ಬೇಕಾದರೆ ಮೀವೆ ಹೇಳಿ ಜಂಭಕೊಚ್ಚಿಯೊಂಡ ಈ ಜೆನ ಎಲ್ಲರ ಬಗ್ಗೆ ಸಜ್ಜಿಲಿ ಕಮೆಂಟ್ ಹೊಡದ್ದನ್ನೇ, ಇದು ಹೇಂಗಿದ್ದು, ಮನೆಯ ಹೇಂಗೆ ಮಡಿಕ್ಕೊಂಡಿದು ಹೇಳಿ ಒಂದರಿ ಇದರ ಮನೆಗೆ ಹೋಗಿ ನೋಡೇಕು ಹೇಳಿಯೊಂಡು ಅನಿರೀಕ್ಷಿತವಾಗಿ ಎಲ್ಲಿಯಾರೂ ಎನ್ನ ಮನೆಗೆ ಬಂದಿಕ್ಕೇಡಿ, ದಯಮಾಡಿ ಬಪ್ಪ ಎರಡು ಗಂಟೆ ಮೊದಲೇ ಫೋನ್ ಮಾಡಿ ತಿಳಿಶಿ ಆತಾ, ಇಲ್ಲೆ ಹೇಳಿಯಾದರೆ ಮನೆಗೆ ಹೊಗ್ಗಿಯಪ್ಪಗ ನಿಂಗೊಗೆಲ್ಲಾ ಬಂದದು ಮನೆಗೋ, ಸಂತೆಗೋ ಹೇಳಿ ಅನ್ನುಸುಗು ಹಾಂಗೇ, "ಲೋಕದ ಡೊಂಕ ನೀವೇಕೆ ತಿದ್ದುವಿರಿ...?" ಹೇಳಿ ಎನ್ನ ಹತ್ತರೆ ಖಂಡಿತಾ ಕೇಳಿಹೋಕು!
ತ್ರಿವೇಣಿ ವಿ ಬೀಡುಬೈಲು
ಮಂಗಳೂರು
No comments:
Post a Comment